Ar 12 Mawrth, cynhaliwyd gweithdy i ddod i gonsensws am y 10 blaenoriaeth ymchwil ar gyfer ymchwil data sy’n gysylltiedig â gofal cymdeithasol i oedolion. Daeth y gweithdy a nifer o bobl gwahanol ynghyd o bob rhan o’r sector gofal cymdeithasol, gan gynnwys aelodau o Gymuned Profiad Byw y Ganolfan Ymchwil Gofal Cymdeithasol i Oedolion (CARE), ymchwilwyr, a gweithwyr gofal cymdeithasol proffesiynol.
Yn ddiweddar, daeth Tara Hughes, sy’n arwain yr ymchwil hwn, i CARE i gwrdd â’r Gymuned Profiad Byw. Gwahoddodd yr aelodau i gymryd rhan yn y gweithdy consensws, gan mai un o amcanion hollbwysig yr ymchwil yw bod pobl â phrofiad byw o ofal cymdeithasol yn chwarae rhan ganolog yn y gwaith o lunio blaenoriaethau ymchwil.
I Tara a’r tîm ymchwil, mae cydweithio â phobl sy’n derbyn gofal cymdeithasol yn hanfodol: “Mae gweithio gyda phobl sydd â phrofiad byw o ofal yn dod â’r broses ymchwil yn fyw,” meddai.
Roedd y gweithdy’n gam allweddol mewn prosiect ymchwil dan arweiniad Gofal Cymdeithasol Cymru ac Ymchwil Data Gweinyddol Cymru (YDG Cymru) i adnabod y cwestiynau mwyaf brys y mae’r sector gofal cymdeithasol yn eu hwynebu, ac y gellir eu harchwilio gan ddefnyddio data cysylltiedig.
Dywedodd Alice Butler, Gweithiwr Ymglymiad Cyhoeddus a Phroffesiynol CARE, am y profiad:
“Mae gweithio gyda Gofal Cymdeithasol Cymru ar y Gweithdy Gosod Blaenoriaethau ar gyfer Ymchwil Data Cysylltiedig wedi bod yn brofiad gwych. Cymerodd pump aelod o’r Gydweithfa Profiad Byw ran yng ngweithdy gosod blaenoriaethau Gofal Cymdeithasol Cymru, a gynlluniwyd yn feddylgar i ddod ag unigolion â phrofiad byw, gweithwyr proffesiynol ac ymarferwyr ynghyd i lunio blaenoriaethau ymchwil data cysylltiedig yng Nghymru.
Mae’n fraint i CARE a’r Gydweithfa Profiad Byw gyfrannu at waith fel hyn ac i gydweithio â Gofal Cymdeithasol Cymru wrth lunio dyfodol ymchwil data cysylltiedig mewn gofal cymdeithasol i oedolion. Edrychwn ymlaen at barhau â’r bartneriaeth werthfawr hon.”
Dywedodd aelod o Gydweithfa Profiad Byw CARE, a chyfranogwr y gweithdy, Mal O’Donnell:
“Roeddwn i wir yn teimlo ei fod yn llwyddiant, yn enwedig gyda’r fformat o allu pleidleisio ar ddiwedd y trafodaethau, roeddwn i wir yn teimlo ein bod ni’n cyflawni rhywbeth a thrwy gael y cyfle i wrando ar safbwynt ein gilydd, mewn grwpiau llai, roedd yn wirioneddol adfywiol.”
Mae Gofal Cymdeithasol Cymru yn arwain tîm Ymchwil Data Gweinyddol (ADR) Gofal Cymdeithasol Cymru i gyfathrebu a hyrwyddo manteision ymchwil data cysylltiedig o fewn y sector gofal cymdeithasol i oedolion.
O fewn yr ymarfer gosod blaenoriaethau ymchwil hwn, mae’r tîm ymchwil wedi gweithio’n agos gyda phobl ar draws y sector gofal cymdeithasol, gan gynnwys gweithwyr proffesiynol gofal cymdeithasol, ymchwilwyr, llunwyr polisi, a phobl â phrofiad personol. Defnyddiasant amrywiol ddulliau ymgysylltu i ddarganfod beth sydd gan wahanol grwpiau i’w ddweud am flaenoriaethau ymchwil ar gyfer ymchwil data cysylltiedig ar ofal cymdeithasol i oedolion. Gyda ffocws ar yr hyn sydd ei angen ar bobl gofal cymdeithasol i oedolion yng Nghymru nawr ac yn y dyfodol.
Gallwch ddysgu mwy am yr ymarfer gosod blaenoriaethau ymchwil 10 uchaf yma: 10 blaenoriaeth ymchwil uchaf: ymchwil data cysylltiedig mewn gofal cymdeithasol i oedolion
Am ragor o wybodaeth, neu i gysylltu â thîm ymchwil Gofal Cymdeithasol Cymru, cysylltwch â: ymchwil@gofalcymdeithasol.cymru
